Leef Kemediegengers,
‘T is bekans weer Toneelgroep Lummeltied! In oktober en november bringe veer veur uuch op de plenk de kemedie “Sjoene Sjien”. Zoe es altied in eus eige Toneelgroep Lummel Tejater. ‘t Keplaon Lochtmanhoes Populierweeg 36 in……. zjustemint Lummel. Aonvaank 20:00 oor en de zaol geit ope um 19:30 oor.
Kaartverkoup is begós!
Op vriedag 6 september en zaoterdag 7 september zien veer begós mèt de veurverkoup vaan de kaarte veur eus zjubileiproduktie “Sjoene Sjien”. Wat waore veer verpópzak door de oontzèttend lange rij vaan lui die allemaol gere ’n keertsje wouwe koupe en daomèt verzekerd zien vaan ‘nne gezèllege aovend. Meh….. d’r zien nog kaarte te kriege, aongezeen veer 12 veurstèllinge veur uuch goon speule.
Extra veurstèllinge!
Door de oontzèttend groete belangstèlling op de ierste twie verkoupdaog höbbe veer beslote um 2 extra veurstèllinge veur uuch te goon speule. Dees extra veurstèllinge zalle gespäöld weure op: Vriedag 15 november en zaoterdag 23 november.
Wie kint geer nog aon ’n keertsje koume?
Vaanaof maondag 9 september is de regelere verkoup begós bij Touwbak speciaolzaak Haddock’s aon de Populierweeg 45 in Lummel. De kaarte koste € 12,50 per stök. Dus..... es geer d’r bij wèlt zien, bedink uuch neet langer en koup ’n keertsje veur ‘nne plezerege en hilarische avond. Ouch dees kier zien de plaotse en rijje genómmerd en zeet geer verzekerd vaan ‘n vaste plaots!
Dees kemedie “Keeping up Appearances” is gesjreve door Roy Clarke. In ‘t Nederlands vertaold “Schone Schijn” door Allard Blom en in ‘t Mestreechs vertaold nao “Sjoene Sjien” door Els Ottenheym.
Bewèrreking: Els Ottenheym, Jolanda Jonkers, en Toneelgroep Lummel. Rezjie: Jolanda Jonkers en geassisteerd door Marijke Gorren.
“Sjoene Sjien” ! Boe geit ‘t euver?
Hyacinth Boekèt deit al draon um bij de Mestreechse ‘Haute Chique’ te behure. Op ‘nen daag liekent häöre druim werkelekheid te weure, es zie ‘ne breef vaan ‘ne wereld bereumpde Mestreechse violis krijg en weurt geïnviteerd um mèt te doen aon ‘ne wedstrijd. Wee de sjoenste vioel wèt te kweke, maag kinnesmake mèt de Maestro en ‘nen daag mèt häöm optrèkke. Hyacinth zèt al op al en wèt de ganse femilie mèt te sleipe in ‘n avontuur wat neet altied eve ‘soepel’ verlöp….. Oondertösse zien häör zuster Daisy en zwaoger Onslow hun 25 jaoreg houweleksfies aon ‘t veurbereie en heet Rose de leefde vaan häör leve gevoonde (meint ze). Ouch naoberse Elisabeth wèt ziech geine raod mèt de escapaad vaan Hyacinth. Al kump tot e hilarisch hoegtepunt
Rolverdeiling
Hyacinth Boekèt - Anja Servais
Richard Boekèt - Ben Dackers
Elisabeth Warden- Aimée van Loo
Daisy - Magda Hameleers
Onslow - Marcel Coolen
Rose - Femke Ramaekers
Postbode, Melkboer, Pelisie, Robèrt, Harie, Robby, Maestro - allen Ronald Gossieau
Lees hier onze: Privacy Policy