Klik op de foto veur 'n vergruting:

Hei-oonder in beeld en wäörd, 'n oetgebreid verslaag vaan deze TGL_daag:

 1. TGL_Daag_2021: https://youtu.be/ydAxO46-QmM

 2. ZjubelarisseTGL2021: https://youtu.be/KCEhTaSVzBg

 3. Oetreike Muulkes: https://youtu.be/SOK7AGXFj4A 
en klik hei op 'nne foto vaan 't muulke veur Femke 
  
Verslaag:

Zaoterdag 16 oktober höbbe veer, nao ‘ne hiele houp corona elend, eindelek weer ‘ns oetstepke gehad. Alle leije kóste ziech opgeve veur deen daag um mèt te doen. In totaal zien veer mèt 35 leije um 11.30 oor aon d’n daag begós. De activiteitekemissie heet ‘ne veuroetzeende blik gehad um deen daag oet te zeuke want ’t waor ‘ne fantastisch sjoene daag, en dat veur midde oktober.

Veer verzamelde bij Chalet d’n Observant en vaan dao oet zien veer goon wandele. Nao ’n good haaf oor waore veer al bij euze ierste tössestop, Buitengoed Slavante. Hij kraoge veer ’n heerleke lunch aongebooje en kóste veer lekker oonderein get klasjenere.

Wie veer ’t buukske weer vol hadde zien veer weijer geloupe. Lekker wandele euver de Sint Pietersberg en in ’t Jekerdal. Tot veer es verrassing aon kaome bij Hoeve Nekum. Hij kraoge veer ’n roondleijing vaan de hier Math Bollen. Heer begós te vertèlle euver zien Hoeve en de wienraank en wat in ’t bedrief allemaol gemaak weurt. Dao nao gónge veer nao binne nao de wienkelder boe veer oetgelach krege op wie zie wien make. Aonsletend mochte veer netuurlek ouch dee euverheerleke wien goon preuve. Veer kraoge wel 5 versjèllende soorte wijntsjes te preuve. Aon ’t ind kóste de leefhöbbers ouch nog get vaan dee lekker wien insloon veur toes. Al bijein ’n sjoen ervaring, um te zien wie zoe ’n fantastisch Mestreechs/Limburgs bedrief ziech kin oondersjeije in dees business.

Oonder invloed vaan al dat lekkers zien veer weer weijer geloupe. Vaanoet ’t Jekerdal weer de berg op en zoe kaome veer weer riechting de ENCI groeve. Via ’t sjoen oetzich op d’n oetkiek en de - volgens Harry - 216 treije, zien veer nao oonder geloupe. Wat ’n sjieke ervaring is dat…. Door de kalkstein groeve zien veer op us gemaak weer trök geloupe nao ’t Chalet d’n Observant boe veer vaanoet vetrokke waore.

Nao ’n lekker drenkske en effe bij gekoume te zien vaan ’t wandele, woort ‘ne heerleke BBQ mèt alles drop en draon geserveerd veur alle genudegde. Aonsletend zien us zjubilarisse in ’t zönneke gezat. Vaanwege corona höbbe veer veureg jaor de zjubilarisse neet kinne höldege en dat höbbe veer vendaog ingehaold.

Zjubilarisse:
- Nardy Bruijnen > 40 jaor (2020)
- Aimée van Loo > 12½ jaor (2020)
- Nel Meijers > 40 jaor (2021)
- Wim Gorren > 12½ jaor (2021)

Nao hiel väöl sjoen wäörd vaan euze veurzitter en oprechte filicitaties, blomme en kedoos, höbbe veer ’t glaas geluf op ’n eders gooj gezoondheid . (De sjoen wäörd kint geer hei trök leze: Zjubelarisse 2020-2021)
Ouch höbbe veer Patrick en Ingrid perficia en hiel väöl gelök gewins mèt hun houwelek dat zie in alle stèlte zien aongegaange.
Anja en Magda höbbe aonsletend “hun offisjeel gedeilte”gehawwe mèt ’t oetreike vaan twie “Muulkes”. Femke Ramaekers en Ronald Gossieau waore door Toneelhuis LFA genomineerd veur hun rol in us lèste productie “Sjoene Sjien”. Helaas heet LFA beslote um in 2020-2021 gein “Muulkes” oet te reike vaanwege corona. ’n Oonbegriepelek besluut en op z’n mins hiel erg jaomer. Anja en Magda höbbe ’n ludieke act opgeveurd en us twie sterre toch ‘n “Muulke” geregeld. Perficia!

Aonsletend höbbe veer nog gezèlleg bijein gezete en höbbe v’r nog ‘ne sjoene en awwerwètse TGL aovend gehad.

’n Groete chapeau aon de leije vaan de activiteitekemmissie, die dee sjoene daag inein gefisternöld höbbe.

Anja, Ronald, Magda, Annemie, Harry, Ronald - Merci

 

Marcel Coolen