TONEELGROEP LUMMEL 40 JAOR: 1978-2018

T BEGIN

In jannewarie 1978 steit ’n advertentie in ’t Lummels Gezètsje... ‘Aw Lummelere’ kinne ziech dat informatiebleedsje vaan Lummel nog wel rappelere.
Dao stoont in tot Theo Gerrits ’ne toneelgróp wouw opriechte in Lummel: op 13 fibberwarie zouw daan ’n bijeinkoms weure gehawwe in ’t Gemeinsjapshoes, neve ‘t Lochtmanhoes.
Deen aovend zaote ‘ne maan of daartien bijein. Dat waore veurnaomelek vrouwe vaan middelbare leeftied vaan de Vrouweboond o.a. Annie Vrinzen, twie meidskes en ein dao vaan waor eus huidege bestuurslid Veronique Muijtjens. De einegste “hiere” (zègk meh ieder twie koejonges, waore Paul Gorren (13 jaor) en Ronald Gossieau (16 jaor) die mèt gekoume waore mèt hun ma’s, Rika Gorren en Mia Gossieau.
Theo Gerrits waor dao mèt zien vrouw Loeki en heer zouw daan de rezjisseur weure.
Deen aovend woort de ‘Toneelgroep Limmel’ gebore.
Contributie woort vasgesteld op eine gölde per week, dus veer gölde per maond, umgerekend noe zoe get 1,80 euro per maond.
E sprookje woort ingestudeerd,” ’t Sprokkelvrouwtje weet raad”, zelf gesjreve door Theo Gerrits en in jannewarie 1979 woort de ierste opveuring gedoon op ‘ne zoondagmiddag in ’t Lochtmanhoes veur ’n klein hoonderd lui. D’n entreepries waor twie gölde en viefteg cent (noe zouw dat einen euro en e paar cent zien!). ’t Publiek waor veurnaomelek kinder mèt hun awwers. Pa Beijer, de legendarische Lummeleer prizzenteerde de nui vereineging aon ’t Lummelse pebliek. De ‘Toneelgroep Lummel’ wis neet wat ze zaog: hoonderd bezeukers in de zaol!!!!
Cent in kas waor bekans neet, dus woorte vaan aw koffieblikke spots gemaak. Decor woort ineingefisternöld, meh soms mós d’n “Technischen deens” ’t aon d’n aandere kant good vashawwe, want es eine hel hoosde hadste kans tot ’t inein veel op de buun.

KEMEDIES

Nao dat begin woort euvergegaange op kemedies en d’n ierste waor nog Nederlands gesproke: “Vandaag geen spreekuur” oet 1980. Ronald van der Capellen späölde veur de ierste kier mèt. Vaanaof 1981 woorte de kemedies in eus moojerstaol gespäöld en kaome mierder hiere de gróp versterke, zoe wie Jack Ummels en Math Meijers.
Ummer mie lui koume kieke: vaan ein veurstèlling góng ‘t, nao twie, nao drei en… dus kaom mie cent in kas.
Bestuurlek gezeen woort e steveg en iezersterk fundamint gelag: Math Meijers woort veurzitter / habsjaar, Ronald Gossieau de kretser, Jack Ummels de PR, Frank Tessers technischen deens en Ronald van der Capellen bestuurslid. Dees samestèlling greujde oet tot ’n geöliede machien en is zoe tösse de 15-18 jaor bijein gebleve tot ind jaore negeteg.
’t Ledeverloup is neet groet; ‘Toneelgroep Lummel’ is ‘n geslote vereineging en dao weurt pas e lid of gasspeuler aongenome es dat nudeg is. De kern bleef ouch de nudege jaore same um de kemedies op de plenk te bringe. Naome vaan kemedies oet de jaore ‘80 waore o.a. ‘En noe bars de bom!’ (in 2001 nog ‘ne kier es reprise gebrach),’ De leeste vaan mien vrouw’ en ‘’t Zal de keend meh zien ‘.
Daoneve woort in die jaore ouch gespäöld in versjèllende bejaardehoezer zoe wie b.v. Lenculenhof. Molenhof, Geuloord, Amie. Dat is noe neet mie veur te stèlle: decor ‘s middags inlaoje vaanoet de hoeve in Lummel, opbouwe, speule veur circa 50 seniore, aofbreke, oetlaoje. Daan woort pas ‘t ierste gleeske beer gedroonke in ’t Kribke um haaf ein ’s nachs. En dat woort veur 400 gölde (veur circa 175 euro) én op ‘ne doordeweeke aovend gedoon...

EN NOG MIE…
De Toneelgroep Lummel woort bekinder in ’t Mestreechse en góng ziech ouch prizzentere op aander gebiede: de Heiligdomsvaart 1983 moot zeker geneump weure. Oonder leiing vaan Huub Noten zaoleger woort e klaank-en leechspeul ‘Het Gouden Huis’ gespäöld op de Vriethof met hoonderde figurante en e paar bekinde Mestreechtenere.
De hiere vaan de Toneelgroep Lummel späölde de volgelinge vaan Sint Servaos. Sintervaos zelf woort gespäöld door euze Jan Gilissen. Alderlei scènes oet ’t leve vaan Sintervaos kraog me te zien tege de machtegen achtergroond vaan de Sint Servaos. De vrouwlui figureerde in de magnefieke massa-scènes. Vaanoet deen tied dateert daan ouch de vrundsjap mèt Jan en de Toneelgroep Lummel en umgedrejd.
Zoe’n zès tot zeve opveuringe woorte gedoon veur circa 3.500 / 4000 lui per aovend. Nao dit relizjieus speul woort daan eders kier oonder ’t toenmaolege aajd-pelitie buro (noe tejater) op de Vriethof, volges good rooms-katheliek gebruuk flink gedroonke, zègk meh rösteg gezope.
Toen zien vaan us de nudege dèks sjeigelentere op de fiets trök nao Lummel gegaange. De aw garde heet ’t noe nog euver de Heiligdomsvaart 1983....
‘T succes vaan ‘Toneelgroep Lummel’ woort groeter: ummer mie opveuringe woorte per kemedie gegeve. Zoe roond 1990 späölde me al zoe’n tien kier mèt e record vaan vieftien: dat kaom door ’t speule in o.a. de bejaardehoezer en “oetspeule” in aander zaole bv. Borghare. V’r gónge riechting doezend bezeukers.
Ind jaore ’80 naom Ronald van der Capellen op veurspraok vaan Huub Noten de rezjiesseurs-scepter euver vaan opriechter Theo Gerrits, dee ziech trök trok.
Zoonder opleiing en ervaring heet Ronald dit fanatiek opgepak en woorte prachtege kemedies gespäöld. Dat waore meistens door ’t bestuur en rezjiesseur oetgekoze kemedies oet Duitsland, Ingeland en Amerika. De rolverdeiling woort bepaold door de rezjiesseur mèt bestuurs-advieze en daonao vertaolde en bewèrkde Ronald Gossieau de Nederlandse versie in ’t Mestreechs.
De PR leep good, decor woort solide en sjoen gemaak, in de beleechting woort geïnvesteerd, grime woort professioneler en dat gold ouch bv. veur affiches, drökwerk (o.a. programmabeukske en entreekaarte).
Neve de Heiligdomsvaarte woort ouch mètgedoon aon de Reuzefeeste en processie. In 1990 heet de ‘Toneelgroep Lummel’ mètgedoon aon ‘n kemedie vaan ’t Mestreechs Volkstejater: ‘Vastelaovend in Mestreech anno 1900’ in de Bonbonnière.
‘T 12.5 jaoreg zjubelei woort ouch in 1990 gevierd en de ierste zjubelarisse waore Elianne Waajen, José Meertens, Annie Vrinzen en Ronald Gossieau.
Naome vaan kemedies oet de jaore ’90 zien o.a. ‘Knók oet’, ‘Fótsje veur ‘ne sjievelcent’, ‘Sjendaol op ’t Hospitaol’. ‘t Pebliek kaom iers oet Lummel en Nazareth, daonao kaom me oet gans Mestreech en zelfs vaan wied dao boete. Hoonderde en hoonderde “fenbreve” woorte bij eder kemedie roondgesjik um de nuiste kemedie persoenlek bij de lui aon te kondege en dat fenbestand woort meh mie wie veer in de jaore 2000 terechkaome.
In deen tied zagte de lui toen dèks tege de speulers: “Geer moot nao d’n theater goon” , meh aander lui zagte daan: “Neet doen... dat is noe de charme vaan uuch.... amateurtoneel vaan topkwaliteit in ’n volkswiek boe de börgemeister, wèthawwer of minister neve de koejong zit te kieke. D’n entreepries blijf daan lieg, me kint gratis parkere en.. e glaas beer heet nog ‘ne leuke pries .
Iemes zag ouch ins tege oondergeteikende: “Die aw mevrouw in häöre witte sjolk die de koffie in sjöd... dat is noe ech Volkstejater!” Veer höbbe ’t daan euver us koffiemeidske, de legendarische ma Beijer zaoleger.
Roond ‘t millennium veel ’t bestuur vaan de ierste jaore oetein en kaome nui frisse bestuurders.
Kemedies oet de jaore 2000 zien o.a. ‘Bombarie um Harie’, ‘Kalbas vol ambras’ en ‘Boe is de boeba?”, stök veur stök zier succesvolle kemedies en klöchte.

SUCCES, ZJUBELARISSE EN DE GERIDDERDE LEDE!

'T aontal bezeukers leep meh op en góng riechting 1500, 2000, 2500, 3000 mèt e record vaan dik bove de 3000 bezeukers.
Dat is geine kattendrèk veur ’n toneelvereineging oet ’n wiek vaan Mestreech.
In 2003 bestoont de Toneelgroep Lummel 25 jaor en dat woort gevierd mèt e weekend veur de ganse gróp in de Voerstreek. Op de receptie in Lummel kaom börgemeister Leers de Toneelgroep Lummel en de zjubelarisse filicitere. Dat waor veur hun 12.5 jaoreg lidmaotsjap Anja Servais en Maria Baltis. Totaal oonverwachs woort de loftrompöt euver de zèlvere zjubelaris Ronald Gossieau gestoke en h’r dach tot h’r op z’n eige begraffenis stoont.
Gans verpópzak kraog heer te hure tot heer veur z’n verdeenste veur de Toneelgroep Lummel woort benump tot Lid in de Orde van Oranje Nassau. Dees sjoen ier euverkaom ouch aajd-veurzitter en bestuurslid Jan Gilissen in 2005: heer kraog e lintsje veur al zie werk binne en boete de Toneelgroep Lummel. Meh ’t woort e keuninklek trio binne de toneelgróp. in 2015 woort kretser en doezendpoet Harry van den Blink verras en heer kraog ‘n keuninkleke oondersjeiing veur al zie werk veur de Toneelgroep Lummel en veur zien verdeenste veur aander vereiniginge.
Jan en Harry woorte ouch benump tot Lid in de Orde vaan Oranje-Nassau.

WIE GÓNG EN GEIT ‘T WIJER…

In 2007 lag Ronald van der Capellen ’t rezjie-stekske neer nao zoe’n twinteg jaor. ’N aontal lede vaan de awwer garde stopde. Mèt ‘ne kleine speulersgróp woort oonder leiing vaan eus nui rezjiesseuse Jolanda Jonkers ’Vleegmesjien Vleegmesjien’ in 2009 opgeveurd (de Mestreechse versie vaan de beroemde kemedie ‘Boeing Boeing’). Dat sloog in wie ’n bom en waor e zier groet succes. Veur dees kemedie kraog de gróp vaan de gemeinte Mestreech de KIP-pries.
In de jaore vaanaof 2010 zien oonder rezjie vaan Jolanda e paar kemedies opgeveurd o.a. ‘Noondetenair obbins mieljonair’ en ‘Allo ‘Allo (in 2015), gebaseerd op de gelieknaomege succesvolle Ingelse tv-serie euver ’t Franse verzèt in de Twiede Wereldoorlog.
2017 is e zier turbulent jaor veur de Toneelgroep Lummel gewees, de kemedie ‘Balconnet & Broedsboekèt’, oonder rezjie vaan Sjeng Verheijden woort door krenkde vaan ein vaan de speulers e paar weke veur de première tijdelek stopgezat en verplaots nao ’n nui speulperiode in 2018. De kemedie woort later definitief aofgebloze. Dat waor ’n zier ingriepende beslissing veur ’t bestuur en de gróp.
In 2018 is de gróp op weeg nao de 26e kemedie mèt de “nui aw” rezjiesseuse Jolanda Jonkers.
Op ’t program steit de kemedie ‘Sjoene sjien’, gebaseerd op de succesvolle Ingelse komische tv-serie ‘Schone schijn’ oet de jaore ’90.
Ouch in 2018 bestoont de Toneelgroep Lummel 40 jaor en dat is intern gevierd mèt ’ne unieke kedo veur de ganse gróp mèt aonhaank. De magnefieke musical ‘Soldaat van Oranje’ woort bezeuk en Ronald Gossieau woort veur z’n 40-jaoreg lidmaotsjap intern in ’t zönneke gezat.
In 2019 zal ‘Sjoene sjien’ weure opgeveurd in oktober en november 2019.
De rolle zalle weure gespäöld door Anja Servais, Ben Dackers, Marcel Coolen, Magda Hameleers, Aimée van Loo, Femke Ramaekers en Ronald Gossieau.

ronald gossieau, jannewarie 2019

 

Kint geer 't uuch nog rappelere? 

Toneelgroep Lummel woort op 13 fibberwarie 1978 opgeriech in Mestreech.
Um persijs te zien in 't gemeinsjapshoes vaan de wiek Lummel door Theo Gerrits zaoliger.
De ierste produksie waor e sprookje en vaanaof 1983 woorte elein nog mer kemedies 
gespäöld in de Mestreechter taol.

Veurgaonde kemedies:

( Es geer hei-oonder op 'nne kemedietititel klik, opent sóms 'nne link nao besjikbaar beeldmateriaol )

 

Nr.

 Kemedie

Jaor

1 't Sprokkelvrouwtje weet raad (sprookje) 1979
2 Vandaag geen spreekuur 1980
3 't Toverelfje vertelt (sprookje) 1980
4 Spróteleköpke 1981
5 Vechten voor geluk 1982
6 't Begòs in de Jeker 1983
7 De väördeur stónt ope 1984
8 De Kèrrekestraot is 'n nette straot 1985
9 Sjaak geit weer vare 1986
10 En noe bars de bom! 1987
11 De leeste van mien vrouw 1988
12 't Zal de keend meh zien 1989
13 1990

*

Vastelaovend in Mestreech anno 1900 (in samewèrreking mèt 't Mestreechs vollekstejater in de Bonbonnière in Mestreech) 1990
14 1992
15 Knók oet! 1994
16 Max & Pol 1995
17 Donna Lèllebèl! 1997
18 Sjendaol op 't hospitaol 1998
19 Bombarie um Harie 2000
20 En noe bars de bom! (reprise oet 1987) 2001
21 Kalbas vol Ambras (zjubileikemedie: Toneelgroep Lummel 25 jaor) 2003
22 Boe is de Boeba?! 2005
23 Miene maan diene maan 2007
24 Vleegmesjien, vleegmesjien 2009 
25 H..H..Han Umhoeg! 2011 
26 Noondetenair obbins Mieljoenair 2013
27 Allo, Allo ! 2015
28 Sjoene Sjien (zjubileikemedie: Toneelgroep Lummel 40 jaor 2019

Sponsors

 ​​​Klik op 'n logo voor grote weergave:

LOGO ENVIDA

VA Advert 202402 Lochtmanhuis Jo Heuts
Logo Lejeune pdf Egbert Kiity Logo Sassen Uitvaartverzorging voor Powerpoint LOGO
Koekkelkoren.jpg LogoGulpenerKl multicopyGR SauterWijnen
logo boerderijke      

Privacy Policy

Lees hier onze: Privacy Policy

Ga naar boven